منتدي بنت الشاطئ للشعر والادب كتب الشاعر رحيم الشيخ طه قطب قصيدة ابي الحبيب

(ابى الحبيب)
الله يرحم ابويا
ويرحم ايام زمان

راحت ايام ابويا
راح وياها الحنان

الحمل كان يشيله
مايقلش يوم تعبان

لاعمره شكى زمانه
ولاعاب على الزمان

لاعمره غدر بحد
ولا عمره مره خان

لاعمره خاف م الزمن
آو يوم يبات جعان

آلله يرحم ابويا
كان حر.م الشجعان

كان يكره المشاكل
لكنه مش جبان

كان متوكل ع الله
و سيبها للرحمن

تعب كتير عشانَّا
ياما ذاق من الحرمان

ياما ذاق المر سنين
ياما نام ساعات شقيان

كان آهم حاجه عنده
ان احنانكون ف امان

كنا احنا كل حاجه
ف حياته وقلبه كمان

كان كل حاجه لينا
يعنى صمام الأمان

لو نزعل كان يجينا
ويطبطب ويواسينا
ويقول انا الغلطان

لو واحد منا غايب
عليه يكون قلقان

او حد منا عايب
ينصحه باللسان

علمنى اكون محترم
علمنى اكون انسان

علمنى فعل الخير
للغير بدون اتمان

حببنى ف الاخلاق
والدين مع الايمان

والله كان بيقلى
اوعى ياابنى الحرام

ماهينفعكش ف يوم
ولا بيه تكون شبعان

إياك يا ابنى تظلم
ولاتيجى عل الغلبان

وصانى بالصلاه
والعدل والاحسان

نام واطمن يا ابويا
مكانك ف الوجدان

ولايوم بتغيب عن عينى
ولا لحظة ف النسيان

لروحك ألف رحمه
ونور من الرحمن

ويجعلنا ف حسناتك
ولصالحك ف الميزان

الله يرحم ابويا
ويرحم ايام زمان

بقلم رحيم الشيخ طه قطب